Савол: Рамазонда кундузи даволовчи уколлар олиш рўзага таъсир этадими?
Жавоб: Даволовчи уколлар икки хил бўлади. Биринчиси озиқлантириш учун қўлланади ва у ейиш-ичишнинг ўрнини босади. Чунки у емоқ, ичмоқ маъносига тушади. Шу боисдан у рўзани бузади. Негаки шаръий далиллар кўзда тутган маъно қайси бир шаклда топилса, ўша шаклга мазкур далилнинг ҳукми берилади. Иккинчи хили эса озиқлантирмайдиган ва ейиш-ичишнинг ўрнини босмайдиган уколлар бўлиб, улар рўзани бузмайди. Чунки шаръий далиллар ҳам лафзан, ҳам маънан уларга тааллуқли эмас. Яъни улар ейиш-ичиш ҳам эмас, ейиш-ичиш маъносида ҳам эмас. Қачонки шаръий далил тақозоси билан бузилиши аниқ бўлмагунча рўза ўз аслига кўра дуруст ҳисобланади.

Савол: Мен қанд касалига чалинган кишиман. Тери остига укол қилиш йўли билан даволанаман. Шундай укол олмасам, танамдаги қанд миқдори ошиб кетади. Хусусан, Рамазон ойида шундан дард чекаман. Рамазонда укол олсам бўладими, Аллоҳ сизларга савоб ато этсин, менга шуни маълум қилсангизлар? Маълумотингиз учун: укол истеъмол қилмаслигим туфайли ҳар йили тобим қочиб, касалхонада ухлатиб қўйиламан ва ўн кунча рўза тутмай қоламан. Кейин ўтиб кетган кунларнинг қазосини тутиб бераман.
Жавоб: Аллоҳнинг Ўзигагина ҳамдлар, Унинг пайғамбари Муҳаммад ибн Абдуллоҳга, Унинг оиласи ва саҳобаларига салавоту саломлар бўлсин.
Сўнг…
Даволаниш учун кундузи мазкур уколни олишингизда ҳараж йўқ ва сизга қазо ҳам вожиб эмас. Агарда тунда укол олишингизда машаққат бўлмаса, шуниси яхшироқ.
Тавфиқ Аллоҳдан. Пайғамбаримиз Муҳаммадга ва у зотнинг оилаларию асҳобларига Аллоҳнинг салоту саломи бўлсин.