Тингловчи: Эшитишимга қараганда қариндош бўлмаган оиладан уйланиш фарзанднинг заковат ва соғломлиги жиҳатидан, қариндошлардан қиз олгандан кўра афзалроқ эмиш. Шу гап тўғрими?
Жавоб: Буни айрим фан мутахассислари айтмоқдалар ва ворислик (ген)нинг таъсири борлигига ишора қилмоқдалар. Генларнинг инсоннинг яралиши ва хулқига катта таъсири борлигида ҳеч шубҳа йўқ. Шунинг учун ҳам «Расулуллоҳ соллаллоҳу алайҳи ва салламнинг олдига бир одам келиб: «Ё Расулуллоҳ, хотиним қора танли чақалоқ туғди» – деб хотинини шармсизликда айбламоқчи бўлди. – Ота-онаси оқ рангли бўла туриб, фарзанд қандай қилиб қора танли бўлиши мумкин?, – давом этди у. Шунда Расулуллоҳ соллаллоҳу алайҳи ва саллам унга: «Туяларинг борми?» – деб савол бердилар. У: «Ҳа», дегач: «Уларнинг ранглари қанақа?» – дедилар. Одам: «Қизил» – деб жавоб берди. Расулуллоҳ соллаллоҳу алайҳи ва саллам: «Уларнинг ичида кулранги борми?» – деб сўрадилар. Одам: «Ҳа» – деди. – Нега ундай?,– сўради Расулуллоҳ соллаллоҳу алайҳи ва саллам. – Томири қувгандир-да?!, – жавоб берди одам. Расулуллоҳ соллаллоҳу алайҳи ва саллам: «Шояд бу ўғлингни ҳам томир қувган бўлса!» – дедилар» (Имом Бухорий 4893, 6341, 6770; Имом Муслим 2756).
Ушбу ҳадис генларнинг таъсири бор эканини кўрсатмоқда ва бунда ҳеч шубҳа йўқдир. Бироқ, Расулуллоҳ соллаллоҳу алайҳи ва саллам: «Хотин кишига тўрт нарсаси: молу мулки, насаби, гўзаллиги ва диндорлиги учун уйланилади. Қуриб кетгур, диндорини қўлдан қочирма!» деганлар (Имом Бухорий 4700; Имом Муслим 2661).
Қиз танлашдаги асос, унинг диндорлигидир. Қиз қариндошлардан бўлсин ёки бўлмасин, қанчалар онгли диндор ва барно бўлса, шунчалар яхшидир. Чунки ҳақиқий диндор аёл молу мулк ва фарзандлар тарбиясида эрининг юзини ерга қаратмайди. Барно қиз эса эрининг шаҳватини қондиради, кўзларини ҳаром нарсалардан сақлайди ва эр ўз хотинидан бошқасига нигоҳ ташламайди.